Посетите «Шуневку» — мемориальный комплекс в Докшицком районе

Шунеўка, Азарцы, Залатухі… Вёскі, якіх не знойдзеш на карце. Толькі памяць пра іх жыве на могілках беларускіх вёсак, на мемарыяльным комплексе “Хатынь” і ў нашых сэрцах.

Бетон і бронза навекі ўвасобілі трагедыю Шунеўкі, каб нашчадкі памяталі, як гінулі іх прадзеды ад куль, гарэлі жывымі ў полымі, як дзеці, кінутыя ў калодзеж, захлыналіся сцюдзёнай вадой. Каб не толькі памяталі, але і ненавідзелі фашызм, не дапусцілі адраджэнне яго на зямлі, узнікнення новай вайны. Каб бераглі мір і цанілі жыццё.

Пасля рэканструкцыі мемарыяльны комплекс “Шунеўка” стаў вельмі папулярным. Яго наведваюць турысты з блізкага і далёкага замежжа. Тут пабывалі госці з Расіі, Прыбалтыкі, Германіі і нават з Вялікабрытаніі. Найбольшае ўражанне ад экскурсіі па мемарыяльным  комплексе «Шунеўка» атрымліваюць школьнікі, пакаленне, якое  ведае пра жахі мінулай вайны толькі з кніг ды кінафільмаў. Вучні школ раёна – частыя госці мемарыяла. У час канікулаў тут пабывалі школьнікі з Крулеўшчыны, Докшыц, Валкалаты, Сітцаў, Гарадзішча, Параф’янава, Порплішча, Бягомля. Мясцовыя педагогі добра разумеюць каштоўнасць падобных паездак у патрыятычным выхаванні падрастаючага пакалення.

Набліжаюцца веснавыя канікулы. Хацелася б бачыць у якасці экскурсантаў у Шунеўцы вучняў Таргуноўскай, Вітуніцкай, Глінскай, Тумілавіцкай, Бярозаўскай, Бярозкаўскай школ, а таксама ўсіх, каму неабыякава гісторыя малой радзімы. Звяртаемся да грамадзян, якія былі сведкамі трагедый населеных пунктаў у гады вайны. Вашы расказы патрэбны ў якасці матэрыялаў для стварэння новай экспазіцыі. Можна тэлефанаваць: 2-07-89, 2-15-64, 8(029)184-32-79 (Velcom).

Мемарыяльны комплекс “Шунеўка”не толькі наша мінулае, ён наша будучыня, якая не зможа адбыцца, калі мы не будзем памятаць пра тое, што перажылі нашы дзяды і прадзеды.

Т. МАЛЬЧЫК,
загадчыца філіяла “Шунеўка” Бягомльскага музея народнай славы.

НА ЗДЫМКУ:  у час экскурсіі на мемарыяльным комплексе “Шунеўка”.