Государственные пособия детям

У адным з папярэдніх нумароў газеты “Родныя вытокі” змяшчалася інфармацыя намесніка начальніка раённага аддзела ФСАН Т.П. Палянскай аб памерах дзяржаўных дапамог па доглядзе за дзецьмі да дасягнення імі трохгадовага ўзросту. Сёння, як мы і абяцалі,  спецыяліст прадоўжыць гэту тэму і раскажа аб памерах дзяржаўнай дапамогі на дзяцей, узрост якіх перавышае тры гады.

Штомесячная дапамога па доглядзе дзяцей, старэйшых за тры гады, назначаецца не ўсім сем’ям, а толькі тым, якія асабліва маюць патрэбу.  Пры гэтым пад увагу прымаецца памер даходу сям’і за мінулы год. Права сям’і на такую дапамогу разглядаецца кожны год па стане на 1 студзеня або па стане на дзень, які наступае за днём спаўнення дзіцяці трох гадоў. Дапамога выплачваецца да таго дня, калі дзіця дасягае 16-гадовага ўзросту (навучэнцам дзённых сярэдніх школ, гімназій, ліцэяў – па ліпень, месяц заканчэння гэтых устаноў, незалежна ад узросту). Дзецям-інвалідам, а таксама навучэнцам, якія атрымліваюць адукацыю за кошт асабістых сродкаў у вышэйшых, сярэдніх спецыяльных і прафесіянальна-тэхнічных установах і не атрымліваюць стыпендыі. Дапамога выплачваецца па дзень спаўнення імі 18-гадовага ўзросту ўключна. Дапамогі на дзяцей, якія вучацца ў школах-інтэрнатах (акрамя прыходзячага кантынгенту), прафесіянальна-тэхнічных, сярэдніх спецыяльных і вышэйшых установах адукацыі з бюджэтнай формай навучання, не назначаюцца.

Для назначэння вышэй указанай дапамогі патрабуецца выкананне некалькіх умоў.

Па-першае, за мінулы год у поўнай сям’і тата, а ў няпоўнай – мама павінны адпрацаваць або атрымліваць пенсію на працягу не менш як 6 месяцаў або атрымліваць дапамогу па беспрацоўі за 26 каляндарных тыдняў.  

Па-другое, у гэтым годзе на момант звароту па дапамогу ў поўнай сям’і тата, а ў няпоўнай – мама павінны быць заняты, гэта значыць, працаваць, атрымліваць пенсію або быць зарэгістраваны ў якасці беспрацоўных (незалежна ад  атрымання дапамогі па беспрацоўі).

Дзве папярэднія ўмовы не распаўсюджваюцца на бацькоў, якім устаноўлена інваліднасць, назначаны пенсія з выпадку страты кармільца або дапамога па доглядзе за дзіцем ва ўзросце да трох гадоў, дзіцем-інвалідам ва ўзросце да 18 гадоў, інвалідам 1 групы, асобай, якая дасягнула 80-гадовага ўзросту.

Трэцяя ўмова для назначэння дапамог на дзяцей, старэйшых за тры гады, – малы даход на члена сям’і ў месяц. Яго памер вызначаецца як сума сярэднямесячных даходаў кожнага члена сям’і за мінулы год, падзеленая на  колькасць членаў сям’і. У састаў сям’і ўключаюцца бацькі і дзеці да 18 гадоў або старэйшыя за гэты ўзрост, калі яны з’яўляюцца навучэнцамі агульнаадукацыйных навучальных устаноў або інвалідамі з дзяцінства 1 і 2 груп і атрымліваюць сацыяльныя пенсіі.

Апошняя ўмова не прымяняецца да сем’яў, якія  выхоўваюць дзіця-інваліда; няпоўных сем’яў, у якіх  бацьку ці маці ўстаноўлена 1 або 2 група інваліднасці, пры ўмове, што ён не працуе і не мае іншага віду занятасці; а таксама сем’ям ваеннаслужачых, якія праходзяць тэрміновую ваенную службу. Указаным катэгорыям сем’яў дапамога на ўсіх дзяцей назначаецца і выплачваецца ў поўным памеры, незалежна ад узроўню сукупнага даходу.

Пры вылічэнні сукупнага даходу ў даход сям’і, акрамя заработнай платы, уключаюцца выплаты сацыяльнага характару. Да іх адносяцца дапамогі па доглядзе за дзіцем ва ўзросце да трох гадоў, дзяржаўная адрасная сацыяльная дапамога ў выглядзе штомесячных выплат, кошт бясплатнага харчавання першых двух гадоў жыцця і іншыя.

Усе атрыманыя даходы пацвярджаюцца адпаведнымі даведкамі.

Інфармацыя пра тое, якія дакументы неабходна прадставіць  для назначэння дапамог на ўтрыманне дзяцей да трохгадовага ўзросту і старэйшых за тры гады, будзе змешчана ў адным з наступных нумароў нашай газеты.

…інвалідам і 80-гадовым

Дапамога па доглядзе за інвалідам 1 групы альбо асобай, якая дасягнула 80-гадовага ўзросту, прызначаецца грамадзянам Рэспублікі Беларусь, замежным грамадзянам і асобам без грамадзянства. Права на дапамогу маюць працаздольныя непрацуючыя грамадзяне, якія не займаюцца прадпрымальніцкай дзейнасцю, не вучацца ў навучальных установах на дзённай форме навучання, а таксама асобы, якія атрымліваюць пенсію, дапамогу па беспрацоўі, штомесячныя страхавыя выплаты ад няшчасных выпадкаў на вытворчасці і прафесійных захворванняў, якія не атрымліваюць штомесячную грашовую дапамогу згодна з заканадаўствам аб дзяржаўнай службе, ажыццяўляючы пастаянны пабочны догляд за непрацаздольным  грамадзянінам.

Дапамога прызначаецца пасля таго, як асоба звярнулася ва ўпраўленне па працы, занятасці і сацыяльнай абароне райвыканкама з заявай (па ўстаноўленай форме), пашпартам альбо іншым дакументам, які сведчыць асобу, і працоўнай кніжкай. Ва ўпраўленне неабходна прадставіць выпіску з дакумента, які сведчыць пра дасягненне чалавекам, за якім трэба аформіць догляд, 80-гадовага ўзросту, копію заключэння медыка-рэабілітацыйнай экспертнай камісіі аб групе і прычыне інваліднасці, заключэнне ўрачэбна-кансультацыйнай камісіі аб патрэбе асобы, якая дасягнула названага ўзросту, у пастаянным доглядзе, звесткі аб неатрыманні дапамогі па беспрацоўі, аб адсутнасці рэгістрацыі ў якасці індывідуальнага прадпрымальніка, члена сялянскай  (фермерскай) гаспадаркі з мясцовых выканаўчых і распарадчых органаў.

Ажыццяўленне догляду прадугледжвае сумеснае пражыванне альбо пражыванне ў адным населеным пункце асобы, якая будзе ажыццяўляць догляд, і непрацуючага грамадзяніна, за якім ён ажыццяўляецца. Дарэчы, сваяцкія адносіны паміж імі значэння не маюць.

Выплата дапамогі спыняецца з 1-й даты месяца, які ідзе за тым, калі наступілі наступныя абставіны: смерць альбо прызнанне невядома адсутнічаючым непрацуючага грамадзяніна альбо асобы, якая ажыццяўляла догляд; зыход тэрмінаў, на якія была ўстаноўлена 1 група інваліднасці, выдадзена заключэнне ўрачэбна-кансультацыйнай камісіі; заканчэнне тэрміну дзеяння віду на жыхарства ў Рэспубліцы Беларусь, спыненне ажыццяўлення догляду, пацверджанае заявай непрацуючага (яго законным прадстаўніком) альбо актам абследавання органа па працы, занятасці і сацыяльнай абароне, паступленне асобы, якая была занята доглядам, на працу альбо заняцце прадпрымальніцкай дзейнасцю, выезд за мяжу і некаторыя іншыя абставіны.
Асоба, якая ажыццяўляе догляд, павінна на працягу 5 дзён паведаміць органу, які прызначыў (выплачвае) дапамогу, аб абставінах, якія спыняюць выплаты даплаты.

У выпадку, калі інвалід прапусціў тэрмін пераагляду, які вызначыла камісія, выплата дапамогі ўзнаўляецца з таго дня, з якога ён зноў прызнаны інвалідам 1 групы, згодна з заявай таго, хто ажыццяўляе догляд.

А.  ТУЛОЎСКАЯ,
начальнік упраўлення па працы, занятасці
і сацыяльнай абароне райвыканкама.