В Докшицком районе школьному питанию уделяется большое внимание

Здымак 1

Сучасны школьнік большую частку дня праводзіць у сценах школы, таму тэма харчавання для яго больш чым актуальная. Нармальна паесці за гэты час хаця б адзін раз проста неабходна для дзіцячага арганізма, калі яшчэ ўлічыць, што далёка не ўсе дзеці прывучаны паўнацэнна снедаць дома. Харчаванню школьнікаў у нашай краіне надаецца дзяржаўная ўвага. Нормы расходаў на яго зацвярджаюцца Урадам Рэспублікі Беларусь. За кошт сродкаў раённага бюджэту прадастаўляецца бясплатнае аднаразовае харчаванне для вучняў 1-4 класаў усіх школ, а таксама вучняў 5-11 класаў, якія пражываюць у сельскай мясцовасці, і дзяцей з малазабяспечаных, шматдзетных сем’яў, дзяцей-інвалідаў. Грашовая норма расходаў складае ад 9050 рублёў да 10950 рублёў у залежнасці ад узросту. Вучні, якія наведваюць групу падоўжанага дня, а таксама вучні 5-11 класаў гарадскіх школ забяспечваюцца абедамі за сродкі бацькоў.

Трэба сказаць, што ў іх кошт уключаюцца толькі расходы на прадукты, але без паслуг па арганізацыі харчавання. Маецца на ўвазе аплата працы работнікаў сталовых, набыццё абсталявання, аплата камунальных паслуг і іншыя. Іх аплачвае раённы бюджэт. Такім чынам, з боку дзяржавы робіцца многае для таго, каб нашы дзеці правільна і своечасова елі і раслі здаровымі. Як арганізавана харчаванне ў навучальных установах раёна, у прыватнасці, у гарадскіх школах, пацікавіліся ўдзельнікі рэйду, арганізаваным рэдакцыяй раённай газеты.

Здымак 2

Як вядома са сказанага вышэй, вучні ва ўзросце ад 11 да 17 год гэтых школ, харчуюцца на платнай аснове. Каб дзіця атрымала паўнацэнны абед з трох страў, бацькам трэба ў сярэднім заплаціць у месяц дзесьці каля 200 тысяч рублёў. У гарадской школе № 1 96 працэнтаў вучняў харчуюцца ў школьнай сталовай. Астатнія, на думку адказнай за харчаванне ў школе Іны Парцянка, не робяць гэта па розных прычынах, але не таму, што бацькі не маюць магчымасці заплаціць за абед. Адны “сядзяць” на дыеце (дзяўчаты-старшакласніцы), іншыя жывуць побач са школай і паспяваюць на перапынку збегаць дадому, каб паесці. У Бягомльскай школе, па словах дырэктара, ёсць і такія, хто не называючы прычыны, катэгарычна адмаўляецца ад абеду ў школьнай сталовай. Зусім галоднымі яны, канечне, не застаюцца. Ёсць школьны буфет, дзе можна набыць выпечку, напіткі без газу і іншыя прысмакі, дазволеныя да продажу ў школьных буфетах. Але гэтыя перакусы паўнацэнна замяніць гарачую страву, канечне, не могуць. Педагогі гарадской школы № 2 да дасягнення мэты 100-працэнтнага ахопу дзяцей гарачым харчаваннем падышлі творча і адказна. Дасканала вывучыўшы пытанне, яны разам з шэф-кухарам Марыяй Карпека, прыйшлі да высновы, што ў дзяцей павінен быць выбар, і склалі тры меню. Першае меню – агульнае для ўсіх – складаецца з трох страў; другое – прапануе першую страву, булачку і чай; трэцяе – салату (адзін раз у тыдзень – бутэрброд), чай; пячэнне ці вафлю. Кошт складае ў межах 3-х тысяч рублёў. Як і меркавалася, да падобных абедаў праявілі цікавасць вучні 7-11 класаў, якія якраз і ігнаруюць сталовую. Яе наведванне адразу стала 100-працэнтным, але дырэктар школы новы падыход да харчавання лічыць пакуль што эксперыментам і дыпламатычна сцвярджае, што час пакажа, наколькі ён правільны.

У час рэйду правяраўся санітарны стан школьных харчовых блокаў, буфетаў, захаванне ў іх асартыменту, дазволенага да продажу. Прыемна зазначыць, што ні ў адной з трох школ памочнікам урача-гігіеніста РЦГіЭ Ліліяй Скурат парушэнняў не было выяўлена. Работнікі, якія там працуюць, добрасумленна адносяцца да выканання сваіх службовых абавязкаў і разумеюць усю адказнасць той справы, якая на іх ускладзена. У памяшканнях сталовых чыста, утульна. Асаблівы эстэтычны густ і культура, якім адпавядаюць карціны на сценах, кветкі ў зале, дзяжурныя вучні, апранутыя ў фартушкі і хусцінкі, пануюць у сталовай Бягомльскай СШ.

Здымак 3

— Культура прыёму ежы за некалькі год зрабіла вялікі крок наперад, – каменціруе ўбачанае тэхнолаг па школьным харчаванні аддзела адукацыі Надзея Несцяронак. – Аб гэтым, як вы заўважылі, сведчаць афармленне абедзеннай залы, сурвэткі на сталах, нават лустачкі хлеба і булачкі, пакладзеныя на асобную талерку. Раней яны клаліся на талерку кожнаму вучню, а то і проста на стол. Значыць, тая вялікая работа, якую мы праводзім з работнікамі харчблокаў школ, не праходзіць дарэмна. Атрымала станоўчыя змены і меню школьных абедаў. У ім асноўнае месца займае садавіна, агародніна, калі мяса – то птушынае, а таксама сокі. Агародніны, вырашчанай на прышкольных участках, а значыць, экалагічна чыстай, у сельскіх школах хапае на ўвесь год, у гарадскіх – прыкладна да палавіны, і гэта таксама немалаважна. Ад вучняў толькі патрабуецца правільна выкарыстаць магчымасці харчавання, якія ім прадастаўляе школа.

Тамара АЛЬШЭЎСКАЯ.
НА ЗДЫМКАХ: 1. Смачныя стравы атрымліваюцца ў кухараў гарадской школы № 1 (злева направа) Наталлі Карніловіч і Таццяны Гаўрыловіч. 2. Недаедзеных страў на талерках не пакідаюць вучні Докшыцкай школы № 2. 3. Гаспадынькі з Бягомльскай СШ.
Фота А. Варанковіча.