Военный комиссар Докшицкого военкомата поздравил с профессиональным праздником сослуживцев

8 красавіка ў нашай Рэспубліцы традыцыйна адзначаецца прафесійнае свята ветэранаў, вайскоўцаў і грамадзянскага персаналу ваенных камісарыятаў.

Усе, хто калі-небудзь сутыкаліся з ваеннай службай, знаёмства з ёй пачынаў з парогу ваенкамата. Яго ролю ў жыцці і дзейнасці Узброеных Сіл немагчыма пераацаніць. На сённяшні дзень ваенныя камісарыяты выконваюць найважнейшыя функцыі: забеспячэнне працаздольнасці нашай дзяржавы і патрыятычнае выхаванне моладзі.

Рэаліі сённяшняга дня паказваюць, што навязванне супярэчлівых пунктаў гледжання на розныя гістарычныя моманты, перапісванне гісторыі з’яўляюцца актуальнымі праблемамі грамадства. Таму ў выхаванні маладога пакалення трэба засяроджваць увагу на захаванні гістарычных каштоўнасцяў і памяці. Гэтыя пытанні знаходзяцца на кантролі не толькі ў настаўнікаў і выхавацеляў, бацькоў, але і ў супрацоўнікаў ваенных камісарыятаў.

Шмат увагі надаюць у ваенкаматах прызыву на воінскую службу, агітацыі і падрыхтоўцы моладзі для паступлення ў вышэйшыя ваенныя навучальныя ўстановы, мабілізацыйнай рабоце па абароне суверэнітэту і цэласнасці Рэспублікі Беларусі, у прыватнасці, Докшыцкага раёна. Актыўна ідзе работа па ўвекавечванні загінулых у гады Вялікай Айчыннай вайны, пошуку новых пахаванняў праз стасункі не толькі з мясцовымі жыхарамі, але і з усёй Беларусі, а таксама іншымі краінамі.

Армія – сіла не толькі ўзброеная, але і духоўная, і культурная. Гэта нельга не ўспомніць у Год культуры. Ваенныя заўсёды былі і ёсць прыкладам мужнасці, вытрымкі, такту. Армія, ваенная служба – гэта крыніца натхнення для мастацкай творчасці пісьменнікаў і паэтаў, мастакоў і кампазітараў.

У святочны дзень ад сябе асабіста і ад усяго калектыву райваенкамата хочацца выказаць словы ўдзячнасці нашым афіцэрам запасу і ветэранам грамадзянскага персаналу. Моцнага ўсім здароўя, бадзёрасці духу, аптымізму і мірнага неба над галавой.

Даведка: Віталь Генадзьевіч Леснічэнка нарадзіўся ва Ушацкім раёне. Скончыў Ваенную Акадэмію. Дзесяць гадоў служыў у 103-й асобнай мабільнай брыгадзе ў Віцебску, пасля – ваеннай камендатуры Віцебскай вобласці. З 2014 года быў намеснікам ваеннага камісара Ушацкага райваенкамата. Са студзеня 2016 года ўзначальвае Докшыцкі раённы ваенны камісарыят. Жанаты. Выхоўвае пяцігадовага сына.

Віталь ЛЕСНІЧЭНКА,
ваенны камісар раёна,
падпалкоўнік.
Фота В. Чарвінскага.