В Докшицах прошёл день призывника (+фото)
У восеньскі прызыў 55 юнакоў нашага раёна адправяцца на тэрміновую ваенную службу, чатыры – на службу ў рэзерве.
Урачыстае мерапрыемства з гэтай нагоды адбылося ў мінулую суботу ў ГЦК.
Трываласці і цярпення, здароўя, новых верных сяброў пажадала будучым салдатам намеснік старшыні райвыканкама Валянціна Рандарэвіч. Яна акцэнтавала ўвагу на тым, што ў краіне робіцца ўсё для таго, каб служба ў войску праходзіла бяспечна і максімальна карысна для кожнага юнака.
Як мага хутчэй адаптавацца да армейскага жыцця зычыў ваенны камісар раёна Віталь Леснічэнка. Ён падкрэсліў, што на сённяшні дзень аўтарытэт службоўцаў з нашага раёна даволі высокі, і выказаў спадзяванні, што сёлетнія прызыўнікі таксама адказна будуць выконваць свой воінскі абавязак перад Радзімай.
– У арміі, як і ў дзіцячым садзе, вас пакладуць спаць, падымуць, накормяць, – такое параўнанне зрабіў падчас свайго выступлення ветэран Узброеных Сіл, былы ваенны камісар Пётр Вязнікаў, які аддаў ваеннай службе 28 гадоў. – Як у школе, вы атрымаеце новыя веды. А “дэмбель” можна параўнаць з выпускным. Розніца ў тым, што ў школе трэба вучыцца адзінаццаць гадоў, а ў арміі служыць усяго толькі паўтара года.
У ліку прызыўнікоў і ўнук Пятра Рыгоравіча – Дзмітрый, які будзе служыць у пагранічных войсках.
Калі для будучых службоўцаў прызыў з’яўляецца адным з самых важных і адказных момантаў жыцця, то для іх бацькоў – вельмі хвалюючым. Як бы ні было цяжка прамовіць ад імя ўсіх бацькоў Наталлі Каросцік, але яна стрымала мацярынскія слёзы і пажадала юнакам з гонарам насіць ваенную форму. Ад імя навабранцаў на ўрачыстасці выступіў Уладзіслаў Макараў з Замасточча. Добрай службы пажадала будучым абаронцам Радзімы першы сакратар РК ГА “БРСМ” Таццяна Гайчук.
Пранікнёныя словы адрасаваў юнакам благачынны Докшыцкай акругі протаіерэй Георгій Мялешка. Ён падкрэсліў, што толькі вера дапамагае нам усім пераадольваць усе жыццёвыя перашкоды. Вера дапамагае ў любой сітуацыі заставацца чалавекам. А таму менавіта гэта пачуццё павінна стаць самым блізкім сябрам не толькі на час службы, але і на ўсё жыццё.
Ва ўрачыстай атмасферы прызыўнікам былі ўручаны павесткі. Асаблівы настрой мерапрыемства падтрымалі канцэртныя нумары мясцовых артыстаў. Фінальнай кропкай Дня прызыўніка стаў агульны здымак на памяць – першае фота ў дэмбельскі альбом.
Сёлетнія навабранцы папоўняць рады 103-й асобнай паветрана-дэсантнай брыгады, 19-й гвардзейскай асобнай механізаванай брыгады, унутраных войскаў Міністэрства ўнутраных спраў, пагранічных войскаў, войскаў ваенна-паветраных сіл і супрацьпаветранай абароны, воінскіх часцей радыёэлектроннай разведкі.
Адпраўка докшыцкіх прызыўнікоў на месцы службы працягнецца з 15 па 25 лістапада.
Тэкст і фота
Яўгеніі МАЛЕВІЧ.
[nggallery id=138]
