Количество тысячников в Докшицком районе увеличивается

Пасля ўручэння ўзнагарод: (злева направа) Наталія Вараб’ёва, Васіль Васюковіч, Мікалай Баброўскі, Сяргей Абірала, Сяргей Маскалёнак, Андрэй Альхімёнак.

Па стане на дзявятага жніўня ў нашым раёне тысячнага намалоту дасягнулі ўжо тры камбайнеры. Да “першай ластаўкі” Віктара Судніка з райаграсэрвіса днямі далучыліся перадавыя механізатары Мікалай Баброўскі і Сяргей Ралавец – работнікі ААТ “Барсучанка” і ААТ “Таргуны” адпаведна.

Тысячнікаў цёпла павіншаваў старшыня райвыканкама Сяргей Абірала, уручыў ім заслужаныя ўзнагароды.

– Ваша праца заслугоўвае самай вялікай пашаны, бо няма на гэтай зямлі больш святой і высакароднай справы, чым хлебаробская, – сказаў Сяргей Уладзіміравіч і пажадаў рупліўцам, якія з года ў год дабіваюцца высокіх вынікаў не толькі на жніве, але і на сяўбе і корманарыхтоўцы, далейшых поспехаў і моцнага здароўя.

Сяргей Ралавец.

Да віншаванняў далучыліся першы намеснік старшыні райвыканкама Наталія Вараб’ёва, старшыня райкама прафсаюза работнікаў АПК Васіль Васюковіч, які ўручыў камбайнерам грашовыя прэміі, кіраўнікі сельгаспрадпрыемстваў Сяргей Маскалёнак і Міхаіл Крукоўскі, старшыні пярвічных прафсаюзных арганізацый гаспадарак, калегі-механізатары.
P.S. Пакуль газета рыхтавалася ў друк, стала вядома, што ў раёне з’явіліся яшчэ тры тысячнікі: Юрый Малюжанец, Вячаслаў Аніковіч (ААТ “Таргуны”) і Аляксандр Саульскі (ААТ “Бягомльскае”).

Алена НЕСЦЯРОНАК.
Фота аўтара.