В Бегомльском лесхозе сеянцы березы выращивают в коробах

Аляксандр Ярашэвіч: “У цяпліцы з сістэмай рампавага паліву добра ўкараніліся будучыя елачкі”.

Каля 250 тысяч адзінак пасадачнага матэрыялу бярозы вырасцілі ў гадавальніку Бягомльскага лясгаса ў карабах літаральна за год.

Мы сустрэліся з начальнікам гадавальніка Аляксандрам Ярашэвічам, каб падрабязней даведацца пра новыя кірункі, якія выкарыстоўваюцца лясгасам для стварэння якаснага насеннага матэрыялу.

– Упершыню задача адысці ад “дзікага” рассейвання бярозы і пачаць вырошчваць дрэўцы ў карабах была пастаўлена перад спецыялістамі галіны летам мінулага года на семінары-нарадзе ў Глускім лясгасе, – расказвае Аляксандр Сяргеевіч. – Яго ўдзельнікам быў прадэманстраваны якасны насенны матэрыял у карабах з усходжасцю практычна 100 працэнтаў. І сапраўды так. Мы вырошчваем бярозу ў карабах толькі год, аднак выснову гэту гатовы пацвердзіць. Насенне нарыхтоўваем самастойна. Праполка будучых дрэў мінімальная, прырост выдатны.

Лесавод Вераніка Кабак даглядае будучыя дрэўцы.

Аляксандр Ярашэвіч запрашае карэспандэнта самастойна ўпэўніцца ў высновах спецыялістаў і дэманструе даўжэзныя драўляныя канструкцыі – карабы. Майструюць іх на гадавальніку самастойна. Шырыня – каля 150 сантыметраў, у даўжыню могуць цягнуцца да 150 метраў. Адзін бок 30-40 сантыметраў, другі – удвая вышэй. Гэта, тлумачыць спецыяліст, зроблена дзеля таго, каб стварыць зацяненне і больш зручна было накрываць пасадкі спанбондам. Высаджваюць насенне ў сумесь пяску з торфам. Для павелічэння вільгацяёмістасці дадаюць перліт. Далей, пры ўмовах добрага паліву, якія, відавочна, створаны ў гадавальніку, насенне прарастае ўжо напрыканцы першага тыдня. Дарэчы, Мінлясгас пакінуў за лесаводамі кожнага рэгіёна права манеўраваць з тэхналогіяй вырошчвання сеянцаў бярозы. Усё ж такі нельга скідаць з рахунку асаблівасці кліматычных умоў, глебы і іншыя ўмовы мясцовасці.

Елкі – у лес, туі – на сядзібу

У гадавальніку можна выбраць кустоўе для азелянення сядзібы.

Зразумела, што бяроза не вядучая культура, а элемент дапаўнення змешаных лясоў. Асноўнымі пародамі, якія выкарыстоўваюцца для лесаўзнаўлення Бягомльскім лясгасам, з’яўляюцца елкі і сосны. Аляксандр Ярашэвіч адзначае, як выдатна адчуваюць сябе сеянцы елкі ў цяпліцах з сістэмай рампавага паліву. Сапраўды выглядае ўнушальна: яркае палатно зелянюткіх дрэўцаў, якіх налічваецца амаль 600 тысяч штук. А між тым работа на гадавальніку не спыняецца. Калектыў падраздзялення не надта вялікі – пяць чалавек працуюць пастаянна, яшчэ чатыры прымаюцца сезонна, а аб’ёмы работы вялізныя. Трымаць тэрыторыю ў 16,8 гектара ў парадку, ды яшчэ і за якасцю насеннага матэрыялу сачыць, за сістэмай паліву, каб не давала збою, хутка рэагаваць на капрызы надвор’я – задач хапае. У дадатак да асноўных відаў вырошчваюць лесаводы клён, каштан, ліпу, абляпіху, дуб, ясень. Па асабліва прывабным кошце можна непасрэдна ў гадавальніку набыць туі рознага ўзросту, многае іншае дэкаратыўнае кустоўе для азелянення тэрыторыі арганізацыі ці ўласнай сядзібы.

Наталля СТАШЭВІЧ.
Фота Аляксандра ВАРАНКОВІЧА.