Докшичане присоединились к республиканскому марафону по скандинавской ходьбе
Напярэдадні Дня пажылых людзей у краіне адбыўся III рэспубліканскі марафон па скандынаўскай хадзьбе “Крок да даўгалецця”. Яго ўдзельнікамі сталі і дакшычане.
Сярод актывістаў наведвальнікі аддзялення дзённага знаходжання для грамадзян пажылога ўзросту ТЦСАН, а таксама прадстаўнікі ветэранскай арганізацыі раёна, для якіх скандынаўская хадзьба – самы звычайны і любімы спосаб адпачынку. Да рэспубліканскай акцыі далучыліся і прадстаўнікі ФСК “Ураджай”, якія прадаставілі спецадзенне і спартыўны інвентар.
– Прыемна, што ў нашым раёне гэты від фізічнай актыўнасці, які падыходзіць для прагулак і ў горадзе, і ў лесе, ды яшчэ і ў кампаніі з прыемнымі людзьмі, выбірае шмат аматараў здаровага ладу жыцця, – у прывітальным слове падкрэсліла начальнік упраўлення па працы, занятасці і сацыяльнай абароне райвыканкама Алена Тулоўская. – На вас – спартсменаў сярэбранага ўзросту, лідараў – сапраўды павінна раўняцца большасць насельніцтва нашага раёна. Жадаю ўсім моцнага здароўя, удачы і бадзёрасці духу.
Любіць прагуляцца па горадзе з палкамі для скандынаўскай хадзьбы Марыя Шылько.
– У першую чаргу дзеля здароўя, – гаворыць Марыя Францаўна. – Дарэчы, гадзіна скандынаўскай хадзьбы роўная прыкладна паўгадзіне энергічнага бегу. Акрамя таго, яна задзейнічае амаль усе групы мышцаў.
– Стараюся больш хадзіць штодзень, – гаворыць Людміла Калбасіч. – Праўда, без палак, але, як сведчыць крокамер, па кіламетраў дваццаць пераадолець атрымліваецца. Рух – жыццё!
Дружнай камандай прайшліся марафонцы ад аддзялення сацыяльнай рэабілітацыі, абілітацыі інвалідаў да брацкага пахавання каля гарадскога стадыёна, дзе аддалі даніну памяці загінулым падчас Вялікай Айчыннай вайны землякам і ўсклалі кветкі да помніка.
Яўгенія МАЛЕВІЧ.
Фота аўтара.
