24 марта — Всемирный день борьбы с туберкулёзом
Дзень барацьбы з туберкулёзам праводзіцца штогод па ініцыятыве Сусветнай арганізацыі аховы здароўя. Яго мэта – прыцягнуць увагу людзей да праблем, звязаных з захворван нем. На актуальныя пытанні па тэме адказвае ўрач-фтызіятр ЦРБ Валянціна Шэвель.
– Валянціна Уладзіміраўна, дзе можна заразіцца туберкулёзам?
– Захворванне перадаецца паветрана-кропельным шляхам ад хворага, які вылучае мікабактэрыі. Інфіцыравацца можна ў перапоўненым памяшканні, калі яно дрэнна праветрываецца, і ад хворага пры блізкім кантакце.
– Якія сімптомы павінны насцярожыць захварэўшага?
– У першую чаргу – кашаль, калі ён не праходзіць больш чым тры тыдні, крывахарканне. А таксама слабасць, страта апетыту і, адпаведна, вагі, павышэнне тэмпературы цела, начная патлівасць, дрыжыкі.
– Як пацвярджаецца дыягназ?
– Пры рэнтгеналагічным даследаванні, у тым ліку флюараграфічным, або пры дапамозе бактэрыялагічнага метаду. Пры выкарыстанні апошняга робіцца мікраскапія мазка макроты і пасеў матэрыялу.
– Чаму пры падазрэнні на туберкулёз патрэбна як мага хутчэй звярнуцца да ўрача?
– Лёгкія адносяцца да жыццёва важных органаў, і ў выніку іх шырокага паражэння можа чакаць лятальны зыход. Таму чым раней выяўлены сухоты і пачата лячэнне, тым вышэйшы шанец для выздараўлення. А з іншага боку, хворы, які не лечыцца, падвяргае небяспецы здароўе іншых людзей.
– Як засцерагчыся ад заражэння?
– Неабходна ўмацоўваць арганізм, як і пры прафілактыцы іншых хвароб: захоўваць рэжым працы і адпачынку, правільна харчавацца, адмовіцца ад шкодных звычак, займацца фізкультурай. Важную ролю папярэджання туберкулёзу іграе чысціня ў вытворчых і дамашніх памяшканнях, адсутнасць запыленасці, добрая вентыляцыя.
У мэтах прафілактыкі сухот у Беларусі праводзіцца вакцынацыя немаўлят на трэці – пяты дзень жыцця. А для кантролю супрацьтуберкулёзнага імунітэту дзецям робяць пробу Манту, Дыяскінтэст.
