На торжественном чествование передовиков АПК Республики Беларусь наградили механизатора с Докшицкого района

У Мінску 9 лютага прайшло ўрачыстае ўшаноўванне перадавікоў аграпрамысловага комплексу. Удзел у мерапрыемстве прыняў Прэзідэнт Беларусі Аляксандр Лукашэнка. На ўрачыстую цырымонію былі запрошаны больш за 400 чалавек. Галоўнымі ўдзельнікамі свята сталі менавіта тыя, хто непасрэдна кожны дзень заняты ў АПК, кіраўнікі гаспадарак, перапрацоўчых арганізацый і тых, што абслугоўваюць аграпрамысловы комплекс, фермеры, перадавікі сельгасвытворчасці, заслужаныя работнікі гэтай сферы.
Прэзідэнт Беларусі Аляксандр Лукашэнка ўручыў дзяржаўныя ўзнагароды, Падзякі Прэзідэнта і падарачныя сертыфікаты лепшым гаспадаркам і работнікам аграрнай галіны рэспублікі.

Быць у ліку лепшых працаўнікоў краіны – высокі гонар. Яго быў удастоены 51 працаўнік Віцебскай вобласці. Докшыцкі раён у складзе дэлегацыі Віцебшчыны прадстаўлялі неаднаразовыя пераможцы і прызёры абласных і рэспубліканскіх “Дажынак” трактарыст-машыніст ААТ “Докшыцкі райаграсэрвіс” Уладзімір Лаўцэвіч і вадзіцель ААТ “Таргуны” Вячаслаў Аніковіч. Асабліва прыемна паведаміць, што ў лік чатыр­наццаці аграрыяў, якім быў уручаны медаль “За працоўныя заслугі”, уваходзіць і Вячаслаў Аніковіч. 

Прыгожая традыцыя — адзначаць свята ўраджаю
«Шмат гадоў мы, святкуючы «Дажынкі», ушаноўвалі лепшых працаўнікоў палёў. Здаўна менавіта яны лічыліся галоўнымі карміцелямі свайго народа, таму і заставаліся адзінымі героямі свята ўраджаю. Але надышоў час пашырыць кола яго ўдзельнікаў і правесці больш маштабныя мерапрыемствы, прысвечаныя вынікам работы ўсіх сфер АПК. Люты выбраны
невыпадкова. Да гэтага часу ўжо вядома, хто як спрацаваў у галіне ва ўсіх рэгіёнах. І самы час рыхтавацца да веснавых палявых работ».
Аляксандр Лукашэнка падкрэсліў, што толькі працаўнікі вёскі ведаюць сапраўдную цану ўкладзенай у зямлю працы. І, нягледзячы на тое, што на дапамогу аграрыям прыйшлі індустрыяльныя і навуковыя дасягненні цывілізацыі, праца земляробаў па-ранейшаму застаецца адной з самых напружаных і цяжкіх.
2018 год — Год малой радзімы
Кіраўнік дзяржавы растлумачыў, што прыняцце такога важнага рашэння выклікалі разважанні аб важнасці малой радзімы ў лёсе кожнага чалавека. «Яна шматаблічная. Для адных гэта родны горад, вуліца ў горадзе або невялікі дворык, вёска, дзе прайшлі лепшыя дзіцячыя гады, для іншых — кавалачак дзікай прыроды, які радаваў вока і дарыў пачуццё напоўненасці і спакою. А для тых, хто паехаў шукаць шчасце ў іншыя краіны, малой радзімай стала Беларусь», — адзначыў Аляксандр Лукашэнка.
Прэзідэнт падкрэсліў, што настаў час кожнаму не толькі ўспомніць аб сваіх каранях, аб месцы, дзе засталася часцінка душы, але і аддаць доўг гэтаму кавалачку зямлі.
«Вельмі хочацца, каб дапамога ішла ад сэрца, стала ўласнай ініцыятывай. Яна можа быць матэрыяльнай, стваральнай, асветнай, творчай — хто як можа і хто колькі можа. Залежыць ад магчымасцей, фантазіі і жадання кожнага. Настаў момант праявіць сябе і ўпісаць сваё імя ў гісторыю гэтай малой радзімы, гэтага кавалачка нашай зямлі», — заявіў беларускі лідар.
Паводле слоў кіраўніка дзяржавы, асабісты ўдзел кожнага ў гэтым працэсе будзе для новых пакаленняў прыкладам сапраўднага патрыятызму, калі прыгожыя лозунгі і словы падмацоўваюцца канкрэтнымі справамі і ўчынкамі.
«І гэта не задача аднаго года. Магчыма, некалькіх гадоў. А лепш, калі стане нормай жыцця. Нашай роднай зямлі патрэбна энергія любові кожнага жыхара, яго вера ў сваю краіну і клопат аб ёй. Беларусь такая, якой мы яе бачым, такая, якой мы яе ствараем. І самае галоўнае — якія мы, такая і яна, наша Беларусь».
Вёскі павінны стаць прывабнымі для моладзі
«Жыццё імкліва ідзе наперад. На палі і фермы прыходзяць робаты, укараняюцца біятэхналогіі. Каму, як не моладзі, уключыцца ў гэты сучасны рабочы рытм? Пытанне прыцягнення ў сельскую мясцоваць маладых спецыялістаў на гэты момант адно з самых актуальных».
Паводле яго слоў, усім разам трэба будзе яшчэ многае зрабіць, каб жыццё ў глыбінцы стала не толькі камфортным, але і цікавым.
Прэзідэнт звярнуў увагу, што прыгожыя і дагледжаныя вёскі і гарадкі, даступнасць для іх жыхароў элементарных даброт цывілізаванага свету — гэта паказчык узроўню культуры ўсёй нацыі. «І няважна, хто будзе жыць і працаваць у вёсцы будучага, чыя яна малая радзіма, — мы ўсе за яе адказныя. Таму што кожны куток краіны — гэта частка Беларусі, нашай агульнай зямлі», — сказаў Аляксандр Лукашэнка.
Кіраўнік дзяржавы падкрэсліў, што гэта тэма павінна прайсці чырвонай ніткай праз увесь Год малой радзімы, якім у Беларусі аб’яўлены 2018 год. «Ёсць мэта, ёсць напрамак работы, ёсць канкрэтныя аб’екты для прымянення творчай, стваральнай і іншай прыкладной дзейнасці — значыць, павінен быць і вынік!»
Харчовая бяспека краіны — аснова эканомікі
«Мінулы год для аграрыяў, у цэлым, быў нядрэнны па выніках, хоць і прайшоў у няпростых кліматычных умовах. І зноў вы забяспечылі краіну хлебам. За гэта вам нізкі паклон».
Асаблівыя словы ўдзячнасці Прэзідэнт выказаў лідарам года па зборы збожжавых. Імі сталі гаспадаркі Гродзенскай і Мінскай абласцей. Самая высокая ўраджайнасць атрымана ў ААТ «Гастэлаўскае» Мінскага раёна (амаль 100 ц/га). Звыш 96 ц ураджайнасці збожжавых дасягнулі ў сельскагаспадарчых вытворчых кааператывах Гродзенскага раёна імя Крамко і «Свіслач».
Парадавалі ў мінулым годзе і поспехі жывёлаводаў. Упершыню ў краіне сярэднегадавы ўдой малака дасягнуў гістарычных 5 тыс. кг. Аднак для многіх гаспадарак гэта даўно пройдзены рубеж. У лідарах — «Моладава-Агра» Іванаўскага раёна, «Вітэкс» Уздзенскага раёна, СВК «Агракамбінат Сноў» Нясвіжскага раёна і «Ларынаўка» Аршанскага раёна. У кожным надойваецца звыш 10 тыс. кг малака на карову ў год.
— Па выніках 2017 года вытворчасць прадуктаў харчавання павялічылася больш як на 3 працэнты, гэта да таго высокага ўзроўню, які мы мелі, — звярнуў увагу Прэзідэнт. — Вядучымі рэгіёнамі ў гэтай сферы з’яўляюцца Брэсцкая, Мінская і Гродзенская вобласці, якія ўзялі на сябе 60 працэнтаў ад гэтага аб’ёму.
Пры гэтым Аляксандр Лукашэнка назваў вельмі важным тое, што, забяспечваючы патрэбнасці айчыннага рынку, беларускія прадпрыемствы захоўваюць і свае экспартныя пазіцыі як на постсавецкай прасторы, так і ў асобных дзяржавах Еўрасаюза, а таксама арабскага, азіяцкага, афрыканскага і лацінаамерыканскага рэгіёнаў. Гэта больш за 60 краін. На думку Прэзідэнта, беларускія малочныя прадукты, без перабольшання, сталі адным з нацыянальных брэндаў. Краіна ўваходзіць у пяцёрку вядучых сусветных экспарцёраў гэтай прадукцыі.
Работа вяскоўцаў цяжкая, але цікавая
«У маім жыцці пашчасціла нямала гадоў працаваць непасрэдна ў вёсцы. Гэта самыя цудоўныя мае гады, — адзначыў Аляксандр Лукашэнка.
Наша моладзь павінна разумець, што яе чакаюць у вёсцы, і самая цікавая работа там. Вёску трэба берагчы як зрэнку вока. Таму што гэта аснова нашага жыцця. Вёска заўсёды не толькі карміла, але і ратавала нацыю ад выраджэння. Так было і ў Беларусі. Таму наша задача — захаваць вёску», — заявіў беларускі лідар.
Лукашэнку падарылі Грамнічную свечку — сімвалічны абярэг беларусаў
Прэзідэнту Беларусі на ўрачыстай цырымоніі ўшаноўвання перадавікоў аграпрамысловага комплексу падарылі памятны сувенір — Грамнічную свечку, якая лічыцца сімвалічным абярэгам беларусаў.
«Вы заўсёды мне дарылі сноп прыгожых каласоў, а гэта, напэўна, яшчэ каштоўней, — сказаў кіраўнік дзяржавы. — Вялікі дзякуй, дарагія сябры! Тысячы ўжо, напэўна, узнагароджанняў за маё прэзідэнцкае жыццё. Але, калі я сустракаюся з вяскоўцамі, — гэта асабліва кранае сэрца і душу. Вы — сапраўдныя людзі. Вы прынеслі ў гэту залу сапраўдны дух творчасці і нашага жыцця. Я за гэта вам вельмі ўдзячны».