Модное кафе «Еда & Кофе» открылось в Бегомле Докшицкого района
Утульнае кафэ “Еда & кофе” спажывецкай кааперацыі адкрылася днямі ў гарадскім пасёлку Бягомль. Новы аб’ект грамадскага харчавання са стыльным сучасным інтэр’ерам з’явіўся пасля пераспецыялізацыі былога кафэ “Мерыдыян”. Як адзначыла першы намеснік старшыні праўлення райста Таццяна Каляга, галоўнае – спадабацца пакупнікам і, вывучыўшы рынак, развівацца далей. На яе думку, новую кавярню хутка ацэняць людзі розных узростаў, асабліва моладзь, бо тут прапануюць аж 15 відаў духмянай кавы, кандытарскія вырабы на вагу.
Дзякуючы набытай параканвекцыйнай печы, якая захоўвае карысныя рэчывы прадукцыі, у прысутнасці наведвальнікаў спякуць свежыя булачкі і слойкі з джэмам. Чакаць прыйдзецца нядоўга – 5-10 хвілін. За ўтульным столікам можна выпіць квасу і з’есці марозіва з начыннем. Для тых, хто захоча добра пад’есці, можна заказаць першыя і другія стравы. Іх гатуюць па рэцэптах беларускай нацыянальнай кухні. Ёсць нават такая экзотыка, як аромамаркетынг. Гэта калі зала праз спецыяльнае ўстройства напаўняецца, напрыклад, пахам бісквіту, які выклікае апетыт у кліентаў.
– Вельмі добра, што такія аб’екты з’яўляюцца ў нашым раёне, – сказаў старшыня райвыканкама Алег Пінчук, які наведаў брэндавы аб’ект “Белкаапсаюза” ў дзень яго адкрыцця. – Тым больш гэта адбываецца напярэдадні ІІ Еўрапейскіх гульняў, падчас якіх наша краіна будзе прымаць шмат гасцей. Важна не толькі прапанаваць наведвальнікам каву альбо гарбату, але і смачна і сытна накарміць іх. Яшчэ, як варыянт развіцця сервісу, трэба паклапаціцца пра культурную праграму, арганізацыю карпаратыўных вечарын і іншых банкетаў.
Трэба адзначыць, што рамонт, на які затрацілі 15 тысяч рублёў, у кавярні зрабілі вельмі хутка. Закупілі сучаснае абсталяванне і посуд на суму 35 тысяч рублёў. Колькасць пасадачных месцаў у асноўнай зале павялічылася да 42-х. Кліентаў у “Еда & кофе” бармэны і кухары чакаюць кожны дзень. Дарэчы, кааператары прадугледзелі нават такія зручнасці, як зарадка тэлефона, бясплатны Wi-Fi, разаграванне ежы, так званых “ссабоек” і камплектацыя тэрмаса.
Таццяна ПАДБЯРЭЗКАЯ.
