Фальклорнае свята “Ручнік як лёс” сабрала аднавяскоўцаў у Гарадзішчы
І гэты ручнік даматканы, чысцюткі,
Як сэрца матулі, і шчодры, і чуткі.
Фальклорнае свята “Ручнік як лёс” у шосты раз сабрала аднавяскоўцаў каля Гарадзішчанскай сельскай бібліятэкі-клуба, каб аднавіць у памяці старажытныя традыцыі і перадаць іх нашчадкам.
Своеасаблівымі праваднікамі з мінулага ў наш час можна назваць тканыя і вышываныя ручнікі. Імі, а таксама яркімі маляўнічымі дыванамі была ўпрыгожана імправізаваная сцэна. Яшчэ напачатку мерапрыемства гасцей сустракалі юныя мясцовыя артысты Валерыя Аўсейчык, Іван Падрэз, Антон Наумец, Павел Масевіч і Ксенія Наумец. Гэта ім – прадстаўнікам падрастаючага пакалення гарадзішчанцаў – завешчана берагчы тутэйшую абраднасць.
Сярод ганаровых гасцей свята зямляк, беларускі кампазітар Мар’ян Зелянкевіч, дырэктар Докшыцкай ЦБС Інеса Марчанкава і ксёндз-пробашч Валкалацкай парафіі Алег Півавар.
На правах гаспадара першым слова трымаў старшыня Валкалацкага сельскага Савета дэпутатаў Пётр Кацейка.
– Свята “Ручнік як лёс” з’яўляецца візітнай карткай маляўнічага Гарадзішчанскага краю, – гаварыў Пётр Баляслававіч. – Вялікі дзякуй нашым паважаным работнікам культуры Таццяне Іваноўскай і Раісе Вярцінскай, а таксама іх памочнікам за адраджэнне спадчыны. Такія святы вельмі патрэбныя ў жыцці, бо ў кругавароце спраў павінна быць месца і адпачынку.
Як сімвал гасціннасці – удзельнікам фэсту быў паднесены духмяны каравай, які да свята штогод выпякае Вольга Януковіч. Кожнага частавала хлебам Надзея Наумец.
Тым часам загучаў гімн свята – песня “Ручнікі”, якую напісаў Мар’ян Зелянкевіч. Яе прыгожа і кранальна праспявала Раіса Вярцінская. Прыемным сюрпрызам стаў сумесны музычны нумар фальклорнага гурта “Спадчына” мясцовай бібліятэкі-клуба і Алега Півавара.
Кожны год арганізатары свята ручнікоў не толькі знаёмяць яго гасцей з рукадзеллем гарадзішчанскіх майстрых. Асаблівасць вясковага брэнда – адраджэнне мясцовых абрадаў. На гэты раз тутэйшая носьбітка фальклору Юзэфа Матошка расказала пра “Папрадухі”, а паказаць іх ёй дапамаглі Баляслава Сварцэвіч, Ванда Янкавіч, Валянціна Літвін, Тэрэза Кімстач і, канечне ж, вядучыя мерапрыемства Таццяна Іваноўская і Раіса Вярцінская. Не адставалі ад старэйшых і юныя артысты. Ксенія Наумец да таго ж сыграла на баяне. Таксама фалькларыстам акампаніраваў Мар’ян Зелянкевіч, а напрыканцы свята падарыў бібліятэцы-клубу аўтарскі зборнік “Бацькаўшчына”.
Колькі цудоўных песень, што колісь спявала яшчэ бабуля 81-гадовай Юзэфы Матошка, прагучала! Колькі прыказак прыгадалі! Танцаў і гульняў паказалі. А якія прыгожыя вершы пра родную Беларусь, пра ручнікі прачыталі Марыя Парневіч і Людміла Кацейка!
Святочную праграму працягнуў канцэрт народнага вакальнага ансамбля “Землякі” Параф’янаўскага СДК.
У рамках свята прайшоў раённы конкурс “Смаката з патэльні і чыгунка”, вынікі якога напрыканцы мерапрыемства падвяла Інеса Марчанкава. Яна ж і ўручыла прызёрам і пераможцам дыпломы і падарункі.
Яўгенія ГІЧАНСКАЯ.
Фота аўтара.
